Vom Niedergang der Sonne ..., 11. Dezember
Kei Angscht da chunnt nid es schrecklechs Apokalypseszenario. Es geit einzig drum, der Titel vo däm Liedkanon mau umzchehre: "Vom Niedergang der Sonne bis zu ihrem Aufgang. Was gscheht denn?
Im Momänt hei mer ja grad die lengschte Necht vom Jahr. Vom Sunneungergang bis sie am Morge de ume ufgeit, vergönge im Momänt rund füfzähehaub Stung. Das isch fei e längi Zyt. Was da alles möglech isch, vo däm ghöre mer im churze aber markante Psalm 134.
Es Loblied i der Nacht
Es Wallfahrtslied. Chömet, lobet der Herr, dihr alli, wo em Herr dienet, wo im Huus vom Herr stöht i der Nacht!
Strecket Öiji Händ uus zum Heiligtum und lobet der Herr!
Der Herr söll di sägne vom Zionsbärg uus: Är het der Himmel und d Ärde gmacht.
Ou wenn es Abe wird und de süferli Nacht, dörfe mir genauso Gott lobe wie am Tag und sy Säge in Aspruch näh.
