Der Weschtwind het äbe scho grad e toue Schübu Wulche häregfuerwärchet a däm Sunntigmorge, 28. Juni. Vieli hei sich gfragt, ob ächt das guet chunnt.

Mir hei's trotz auem gwagt und eifach mau losgla mit der Predig. Zum Ygangsspiel vo der Alphorngruppe Ahorn het ds Treichle vo üsere nöje Ratsglogge schön klunge.

D Lektorin Ursula Strahm het der 147. Psalm na der bärndütsche Übersetzig gläse. Sie het derzue ufmerksami Zuehörerinne und Zuehörer gfunge.

By der Predig het der Pfarrer probiert darztue, wie wichtig dass es isch en eigete Standpunkt ou mau chönne z hingerfrage und derzue d Viufaut vo Meinige z akzeptiere. Mit Vielfalt und Differänzierig fingt me am ringschte zu Gmeinschaftssinn. Illuschtriert het er das mit em Quodlibet "Ds Waldkonzärt". Es luschtigs Singspiel mit föifne Strophe, chrüz und quer dürenang und glych zäme fertig wärde. Die singfröidige Heimsbacher hei die Useforderig meischterhaft glöst!

Und was isch de ungerdesse hinger em Hüttli vor sich gange? D Ching hei mit em Dani Gysel chönne es Wydepfyfli schnitze und de ihres chlyne Waldkonzärt uffüere.

Bis am Schluss vom Gottesdienscht isch de ou d Gluet prima parat gsi für d Würscht überztue. Ds Wätter isch by lengerschi fründliger worde und nach eme gmüetlige und fröhliche Bynangsy het sogar d Sunne scho ume hinger de Wulche afa füregglüssle.