- Home
- |
- Aktuell
- |
- News
- |
- Archiv Trachselwald
Der Sunntig halte, 4. Mai
Der Sabbat isch wäg em Mönsch gschaffe worde und nid der Mönsch wäg em Sabbat. Mk 2,27
Eso reagiert Jesus uf d Kritik vo de Pharisäer, wie me d Yhaltig vom Sunntiggebot am beschte z Stand bringt. Ds Halt vom Sunntig söll i d Freiheit füere und nid us Pflichtgfüel erfolge. So cha Jesus Chrischtus Herr wärde über e Sunntig und alli, wo ne tüe fyre. Ds Ungerwägs sy geschter mit em Abesäge vo Huus zu Huus het mi sehr bewegt und berüert. A allne Etappeorte het scho es schöns Tschüppeli Lüt uf üüs gwartet - säubschterverständlech im gebührende Abstand zunenenag, Komplimänt! Mit ere churze Abeliturgie, en ere Bibelläsig und zwöine Lieder hei mir e fyrleche und bsinnleche Momänt zu de Lüt hei chönne bringe. Viune Orte z ringsetum hei mer's gseh rägne, aber über üsem Grabe si mer vo Niederschlag verschont worde so lang mer ungerwägs si gsi. Im Gägeteil, a eim Etappeort hei sich d Wulche plötzlech eso verhoge, dass d Sunne ab em Ungerga es prächtigs guldigs Liecht uf d Landschaft het chönne wärfe. Da isch eim würklech ds Härz ganz wyt ufgange.
Danke a dere Stell ganz härzlech am Fritz und am Ernst, wo die churze Fyre mit Alphorn- und Triechelkläng umrahmet hei.