Übrigens: wenn Dir uf üsi Homepage göht, chöit Dir uf der Startsyte mit eim Klick das Video starte. Es git so viel Sache und Erfahrige i üsem Läbe, wo mir gärn die Wichtigschte möchte sy. Im Ugmang mit de digitale Medie bin ig das bis jetz definitvi nid gsi. Aber, was nicht ist, kann ja noch werden... Wär weiss?

Spass aparti. Mi dünkt, der Bibutext, wo i däm Video gläse wird, cha me sich guet als Ratschlag la gseit sy. Drum schryben ig ne hie im Newsartikel no mau uuf:

Jede wett der Wichtigscht sy

33Sie si uf Kafrnaum cho. Im Huus inn het Jesus syner Jünger gfragt: "Über was heit dihr ungerwägs so yfrig gredt?" 34Sie hei gschwige. Sie hei drum ungerwägs zigglet, welen ächt der gröscht vo ne syg. 35Er isch abgsässe und het die Zwölf zue sech grüeft und het ne gseit: "Wen eine der erscht wott sy, söll er der letscht vo allne sy und der Diener vo allne." 36Er het emne Ching grüeft, het's zwüsche sen yne gstellt, het's a nes Ärfeli gno und zue ne gseit: 37"Wär eis vo dene Chinder mir zlieb zue sech nimmt, nimmt mi zue sech. Und wär mi zue sech nimmt, nimmt nid mi zue sech, aber dä, wo mi gschickt het."

Us der Guete Nachricht vom Markus, Kapitel 9, Värse 33-37