Scho e Wuche vor em Reisedatum hei d Seniore vo Heimisbach ds Wätter beobachtet u ghoffet, am Zyschti wärd es de wohl Reisewätter gä, aber es isch äbe du grad nid eso gsi. Wo mer i Summer-Car ygstige si, het’s haut eifach grägnet. Aber d Schtimmig isch glych heiter blibe u mi het doch chönne erwarte, dass es de nid grad der ganz Tag eso syg.

Wo du äntlige alls isch zueche gsi u i Car ygstige, hei mer chönne losfahre. Mir si vo der Froupresidänti härzlich begrüesst worde u ou der Schofför, der Schneider Ruedi het üüs allne e schöne Tag gwünscht. D’s Huttu heimer afe churz e Blick uf di grossi Boustell chönne mache u du isch es wyter gägem Luzärner zue. Ds Willisou het eim scho öpper mit de Willisouer-Ringli gluschtig gmacht. Aber mir hei jo wyter wölle u scho ds Mänznou heimer by der Spanplattefabrigg di grosse Houzvorrät, wo jo viel vo üsem Holz vom Heimisbach derby isch, bestuunet. Mir si wyter gäge Wolhuse Wärtestei richtig Luzärn. Der Räge het du afe ufghört u der Himu isch gäng heiterer worde.

Will der Ruedi gwüsst het, dass es i der Stadt Boustelle het, isch är über d‘ Rängg gäge Kriens gfahre und dert simer no grad einisch am Vierwaldstätter See aglangt. D Sunne het du dert e chli dür d Wulche düre züntet, es isch e wunderschöne Ablick gsi ubere See ewägg. Der Bürgestock het me mit de viele Boukrän, u hinger dra der 160 Meter höch Hammetschwanglift gseh.

Mir si wyter em See no, ds Hergiswil düre, d Achereggbrügg links lo si em Alpnachersee no über Alpnach, wo der Pilatusbahnhof isch u gäge Sarne zue. Dert hei mer du abgha gägem Gloubebärg. Bym Uechefahre het me e schöne Blick is Obwaldnerland gha, is Mälchtal iche u vordrann d Kapälle Flüehli Ranft, u meh rächts, über e Arnersee richtig Brünig bis ueche zum Lungeresee.

Die höchere Bärge hei sich im Näbu versteckt u mir hei alli ghoffet, mir chömi de nid ou no grad i Näbu ueche. Bi der Wirtschaft „Langis“ het Ruedi dür di schmali Stross gäge üsem Reiseziel Schwändi Kaltbad abgha. Dert hei du afe alli d Bei echli chönne strecke, mi het churz d Landschaft, wo eim fasch echli a d Freibärge gmahnet het agluegt u mi isch churzum i d Wirtschaft iche u het sech dert grüppeliwys gsädlet.

Mir si vo de Wirtslüt fründlech begrüesst worde u druf hei si üs es ganz guets Mittagässe brunge. Fleischvögu mit Stock u re Gmües-garnitur. Es isch wunderbar gsi. Es isch scho schön, we d Froue einisch nid sälber müesse choche. Was doderbi alls isch brichtet worde, das gäbti wahrschinlich veiechli es dicks Buech.

Es isch do albe es grosses Kurhotel gstange, aber es sig äbe 1970 total achebrönnt u isch halt nümme ufboue worde. Imene chline Näbebou vom Hotel hei du d Wirtslüt wider agfange Gescht z bediene u hei speter ds hütige Resturant boue. Im Gang unger der Stäge hei si no e Mangi vom alte Hotel ufgschtellt, sod’säge als Zytzüge. Es isch es beliebts Wandergebiet u im Winter wird e längi Langloufloipe präpariert. Mi gseht scho, dass a schöne Tage dert hinger öppis louft. Si hei viel Platz für d Gescht ds bediene.

I der Kapälle grad über d Stross het üs der Pfarrer Peter Schwab zure churze Andacht iglade. Für die, wo nid grad guet z Fuess si, isches guet, dass di Kapälle nid witer dänne steit. D Lieder, wo mer gsunge hei, hei i däm Ruum wunderbar klunge. Peter het si Predig guet der Landschaft vom obere Schlieretal apasst, het vo liesli u vo luut gredt, derby het är luut no verbesseret uf luter, das heisst klar. U die Gägend isch nid nume liesli, si isch äbe rächt still u ds Wasser vo der Schliere isch do obe ganz klar.

Drufabe isch me wider i d Wirtschaft go es feins Dessär gniesse u no disersch u äis chönne brichte. Mir hei gnue Zit gha derfür. Aber wi nes so isch, geit haut d Zit gleitig verbi. Mir hei dä schön Ort ume müesse verloh u gäge heizue fahre. Ubere Gloubebärgpass, 1540müM, Finsterwald, Äntlibuech simer gägem Ämmetal zue u si glücklech u zfride i Heimisbach zrugg cho. Jo, die Froue vom Froueverein hei für üüs e schöne Tag organisiert, hei üüs ungerwägs mit Schöggeli, düüre Schnitz u mit dünnem versorget. Danke vielmal! D Barbara wo für all Fäll parat isch gsi het nid gross Arbeit übercho u das isch ou rächt eso. Ou ihre es schöns Merci. Em Ruedi e grosse Dank für di sicheri Fahrt u di inträssante Informatione wo är ungerwägs het düregäh. Natürlech danke mir ou em Pfarrer Peter Schwab für di wärtvolli Begleitig.