Oberlandferie Hotel Belle Epoque Victoria Kandersteg 19.-25. Juni

Am Mittag vom 19. Juni hei mir üs bim Schueuhus Chramershus besammlet. Nach eme härzleche Grüesti u em verlade vom Gepäck geites Richtig Oberland. E agnähmi Fahrt im Bus oder Privatouto bringt is uf Kanderstäg.

Im Hotäu Victoria si mer fründlig empfange u mit Kaffee u Kuchen bewirtet worde. Nach em Zimmerbezug isch no Zit blibe für chli umezluege. Der erscht Idruck isch ömu afe guet. Mit eme feine Znacht hei mir dä Tag beändet.

Der Sundig foht du chli angers a weder deheim. Wüu Corona geng no es Thema isch bruchts Maske u Händsche für sech am viusitige Zmorgepüffe go z bediene. Es isch ou sehr guet gsi. Bim anschliessende Gottesdienscht ir Chiuche chöi mer ou d Toufi vom Pascal miterläbe. Der Usflug uf Sunnbüehl am Namitag bringt is richtig zum stune. Ersch isch doch do no Schnee gläge u jetz e setigi Bluemebracht.

Der Bsuech am Mändi a Öschinesee blibt sicher ou aune ir Erinnerig. Es het drum e chlinere Feussturz gä. Das rumple wet me aber nit grad Autag ghöre. Wär no Luscht het gha, het am sächsi no es Konzärt bsuecht. Di churze Andachte mit em Peter Schwab si ou geng idrüklig. I Biud u Wort hei mer öpis us em 104. Psalm verno.

Am Zischtig gits e churzi Wanderig zu re Brätlisteu. Dört isch der Ärnscht scho tou am füre. Gli het jedes e Bratwurscht oder e Servela mit Brot u verschidene Bilage chönne gniesse. Isch das e gmüetlige Nomitag gsi. Ds Vorläse nam Znacht vo Mitglieder us der Gruppe bringt eim öpe ou no zum schmunzle.

Der Mitwuche gseht wider ganz angers us. Mit Busse simer ufeme schmale Strössli is Gaschteretau cho. Wüu s Wätter so guet isch chöimer dusse hocke u di Bärgwäut bewundere. Ou Wanderfröidegi chöme nit z churz. Guet gschterkt geits wider zrug uf Kanderstäg. Der Chaufeur het no es paar Mou stiu gha das mer dä schön Wasserfau oder di töife SChluchte no einisch hei chönne aluege. Es si o es paar unerschrokeni unger üs gsi, wo der Rückwäg z Fuess hei gmacht.

S anschliessende Turne mit der Anita het o nid dörfe fähle. Nam Znacht  geits i d Chiuche. Dört zeigt üs d Frou Doris Wandfluh wi si auti Brüch wider lö lo ufläbe. Zwüsche iche gits e chline Ungerbruch wo mir e Aupufzug hutnah chöi miterläbe, Der ganz Obe isch mit schöne lieder wo der Hans Schüpach uf der Orgele gspiut het igramet worde. Er isch jo ursprünglech en Ämmitaler.

Je nach Luscht u Lune het me der Donschtig gstautet. Nach eme churze Rägeguss am Morge het sech d Sunne gli einisch wider füre glo. Di einte mache e Wanderig zum Biotop angeri si uf Frutige is Tropehus u wieder angeri lockt es zum ene Stadtbummel im Wallis, z Brig. Os lädele ghört zu de Ferie. Am Obe zeigt nis du der Niklous no di schöne Fotone wo ner di ganzi Wuche gmacht het. Ou der Schetzigswettbewärb wird ufglöst.

U scho heissts wider Gufere pake. Es letschts Mou geits am Fritig zum schöne Zmorgepüffe. Ou s Znacht isch gäng guet u mit viu Liebi zuebereitet gsi. No einisch e churzi Andacht de heists ilade abfahre. Im Chrummhouzbad erwartet is du zum Abschluss vo der schöne Wuche no es guets Mitagässe. Danke viumau em Spänder.

Üser Begleitgruppe: Pia u Peter Schwab, Anita u Niklous Meischter, Käthi u Ernst Büehler u Werner Sommer es ganz härzlechs Dankeschön. Hoffe mer doch aui, das si no mängi schöni Feriewuche chöi organisiere. Danke!!!

Bilder: Niklaus Meister, Text: Vreni Wüthrich