Ein heller Morgen ohne Sorgen folget der düsteren Nacht.

Nach Dunkel und Schatten leuchten die Matten,

die Flur und der Wald erwacht.

Des Schöpfers Macht hat Licht gebracht.

RG 578

Liebi Lüt, es isch tatsächlech e hälle u fründliche Morge, wo hüt am Sunntig 15. März der fyschtere Nacht nachgfolgt isch. Dass er aber ohni Sorge derhärchunnt, das häufe äuä die meischte vo Öich mit mir bezwyfle. Da chöi ou die Wort us Philipper 4,6 nid drüber ewägg tüüsche, wo's heisst: Chummeret nid, bringet lieber alls, wo dir uf em Härz heit mit Danke im Gebätt vor Gott.

Bringe mer ds erschte vilecht nid fertig, chan is ds zweite doch glinge ou denn, wenn mir uf Grund vo de verordnete Massnahme us em BAG die meischte Aktivitäte i üser Chiuchgmeind vorübergehend müesse ussetze. Am Tag druf isch jetz ou klar, dass kener öffentleche Gottesdienschte meh chöi düregfüert wärde.

Wie's nach em 19. April wytergeit, wüsse mir aui im Momänt no nid. Bitte beachtet derzue d Agabe im Chiuchezedu vom Azeiger und ou d Homepage luege mir vo Tag zu Tag aktuell z halte.

Falls Dir e Chummer heit, wo Dir gärn mit öpperem möchtet teile, zögeret nid uf ds Telefon vom Pfarramt azlüte. Ds Nummero: 034 431 11 52. Ig wirde äuä die nächschti Zyt rächt guet erreichbar sy dert, wiu ig mehr Zyt im Büro mues verbringe, als mir lieb isch.

Dass mir bi all dene Unwägbarkeite und Risike das dörfe erfahre, was de no wyter im Philipperbrief steit, das wünschen ig üüs allne ganz fescht!

De wird der Friede vo Gott, wo wyt über jede Verstand usegeit, öies Härz und öiji Gedanke bewahre und behüete, wiu dir zu Chrischtus Jesus ghöret.