Nach ere zwöijährige Pouse isch es am Samschti, der 19. Ougschte eso ab de haubi eis  uf em Schueuhusplatz Chromershus läbig worde. Do isch ä Bus vo Fuhrer’s mit äme Ahänger zwäg gstange, und zwöi Privatouto mit offene Guffererüm o no grad.

No dis no isch du o ä chlini Chuppele Seniorinne und Seniore mit Guffere, Ruckseckli, Täsche, Rollator, Chrücke, Wanderstäcke , Sunnebrüue, Sunnehüet u fröhliche Gsichter pünktlech  agrückt.

D’Begleitpersone vo dene Ferietechniker, es si gsamthaft  Siebni gsi, hei das Reisegepäck gleitig u mit Syschtem  verschtouet. Mir hei chönne istiige u los isch gange, vou fröidiger Erwartig äm erschte Kaffihaut egäge. Es isch ehnder ä schtiui Fahrt gsi bis is Restorant Steibrüchli Brugg-Lauffohr. Viellicht het öppe em Einte oder Angere  s’Mittagsnückli gfäuht. Item.  Bime Kaffi oder süsch öppis Dünnem u äme  Nussgipfu, wo isch parat gsi für jedes, si d’Läbesgeischter wieder erwachet.

Na däm wiukommene Haut geits zügig über d’Gränze üsem Feriezieu zue.

Für die nächschte paar Tag si mir im 4-  ****  Hotäu  deheim.  Fital-Hotäu heisst das, u das bedüdet  „Fit im Alter „

Mir chöi üser Zimmer bezieh u nachhär zeigt üs d’Schefin vom Huus wo das mir was chöi finge. S’Agebot isch gross u toll:. Schwümmbad, Fitnessrum, Massage, Schönheitssalon, Coiffeur, was wosch no meh?!!

Höcheschwand isch uf 1015 m über Meer, ca. 20 Km  oder 15 Minute vo der Schwizer-Gränze ewäg. Es isch der höchschglägnig heilklimatisch Kurort ds’Dütschland , uf äme sunnige Südplateau, u drum seit me däm Ort o„Dorf am Himmu“. Nam Nachtässe hets no angänds Rueh gäh.

U so isch es witergange: Gäng bim Morgenässe isch de us cho, was üser Begleiter hei ustüftelet gha, Das isch ä spannendi Sach gsi für üs. U jede Morge isch de vom Hotäu o ä Morgeposcht uf em schön parat gmachte Tisch gläge, wo me het gseh, was im Dorf oder ir Umgäbig öppe los isch.

Am Sunnti vormittag hei mer im Kurpark vo Höcheschwand äs Sunntigskonzärt mit der Hotzenwald Bauernkappele Göhrwil chönne lose u zur Predigzyt i der spezieue Chiuche d’Andacht go lose. Die ganzi Wuche het is’Thema Liecht beschäftiget. Der Nomittag hei mer frei chönne mache, was es Jedes het wöue.

Am Mändi  hei mer mit der Anita ä chli a üsere Fitness baschtlet u nach äm Zmorge bi Musig sämtlichi Muskle beschäftiget. Im Aschluss si mer is Rosedorf Nöggenschwiel schoffiert worde. Es si uf ca. 200 qm über 500 fein schmöckigi Rose z’bewungere u d’Nase isch uf ihri Rächnig cho. Ä schöni chlineri Chiuche hei mer hie  o dörfe aluege, Aus eifach ganz schön u für’s Gmüet.

Am zrüggfahre het’s ä Haut gä im „Rössli“ Tiefenhäusern, wo mir üs bi Kaffi u Chueche resp. Turte hei chönne a Lyb  u ab em Chäuner bim Lache erfröie. Nach äm Z’Nacht, wo mer am Tag vorher aube us 3 Mönüvorschleg hei chönne bschteue, isch dä Tag mit Singe u Spiele z’Änd gange, u viellicht hets im Troum no chli nach Rose gschmöckt.

Am Zyschti hei mer nach em Zmorge mit em Peter Schwab ä bsinnlechi Andacht über Liecht u Schatte i üser eigete chline Waudkappäue chönne erläbe. Rings ums Hotäu isch ä schöne Park mit Bänkli u mit Bäum, wo d’Escht grad ä so ne chline Pavillon gformet hei, äbe grad wie nes chlis Kappäueli.

Jitz hei mer üs riesig gfröit uf e Mittag. Üser guete Geischter hei nämlich bim Sportzäntrum Höcheschwand ä Brätliplatz usgmacht gha, si gsi go ichouffe, u hei für üs dert Bratwürscht u Cervelat brätlet. Wär het möge, isch  häreglüfe oder mi het chönne mit äm Bus a dä gmüetlech Platz cho.  Mit z’Trinke u auerlei Schnousizüg hei mir gläbt wie d’Fürschte. Aschliessend hei mer ä chlini Wanderig gmacht zur Marienkappäue, Das hei wieder aui chönne u möge gloufe oder de si üser  Begleitmanne oder Froue gäng parat gsi zum ä chli stosse oder zieh. Vo der Mariekappäue het me ungloublich wit ringsum gseh. E chli Dunscht het der Blick i d’Schneebärge zwar hingerha. Trotzdäm, eifach unfassbar schön, wiit u grosszügig die Landschaft.

Am Obe isch im Dom z‘St. Blasie äs Orgelekonzärt bote worde. Wär gärn settigi Musig het, isch  go lose. Uf der mächtige Schwarz-Orgele (55 Register, 263 Hilfszüg  u 3891 Pfiffe) het der Bernhard Marx, Titularorganist am Dom vo St. Blasie äs gwautigs, idrücklechs Füürwärk vo klassische Wärk für üs härezouberet. Derwile hei die im Hotäu verblibene angere Ferietechniker bi Jass, Spiu u Gsang ä gmüetleche Obe verbrunge.

Der Mittwuch het is ä gmischti Stung mit der Anita u mit der Nina beschert. Bi bsinnliche Wort  vo der Nina u de passende Bewegige mit der Anita hei mer dörfe ä schöni Stung verbringe.

Am Mittag si mer mit Elan u Vorfröid i d’Outo igstige u hei nis riesig uf d’Schifffahrt uf em Schluchsee gfröit. Mir hei di Fahrt uf em See gnosse. Bi der Alegesteu Unterkrummen hei mer s’Schiff verloh, für z’Fuss ä Abstächer i d’Vesperstube Unterkrummenhof z’mache. Das hei aber viu Angeri o im Sinn gha, trotzdäm hei mer chönne äs Plätzli ergattere u chli d’Gäged gniesse. Mit äm nächschte Kursschiff si mer du drufabe wieder zum Usgangspunkt gfahre, übere Staudamm zum Bus glüffe u wiederum zfriede i üses Feriedomiziu gfahre worde.

Wär het Luscht gha isch no chli is Hallebad go schwümme oder het  eifach no gmacht, was ne gluschtet het. Am Obe  isch im Kurpark äs Obekonzärt mit de „Aubachtal Musikanten“ agseit gsi u o vo üs bsuecht worde oder mit het sech wieder mit de luschtige Spiu oder em Jasse vergnüegt.

Der Donnschti het verschiedenes im Agebot gha. Im Städtli St. Blasie der Dom go aluege, dert chli go lädele. Oder im  Hüsli Grafenhausen-Rothaus,äs chlis Museum, Schwarzwäuder Tradition und Läbesstil go aluege ähnlich wie Ballebärg bi üs, Oder d’Brauerei  Rothaus besichtige. Für Aues  isch Interässe do gsi  u ä de si öppe Aui uf ihri Rächnig cho. So hei mer üs langsam uf ä Heireisetag am angere Morge chönne vorbereite.

Am Obe het is zum z‘Nacht  es unghür richhautigs Schwarzwaudbuffet erwartet, troumhaft zwäggmacht für’s Oug u mit äre Uswau, dass me schier nid gwüsst het, wo u mit was afo,  u em Einte oder Angere bau bau ä chli s’Schilet zäng worde isch.

Derno het’s gheisse, tüet de hinecht no packe, dass mer de einisch chöi fahre morn.

Am Fryti heimer  Abschied gno vo dere wunderschöne offene Landschaft u si wieder gäge d’Gränze gfahre. Üse Schofför muess ä guete Idruck gmacht ha, mir hei ömu nid müesse stiu ha. Die Zöuner wärde dänkt ha, die hei doch nume öppe Hüehnerougepflaschter u Rheumasaubi ikouft.  No einisch ä Kaffihaut  in Köllike  u nach äm feine Mittagässe im Chrummhouzbad si mer aui glücklech, mit viu schöne Idrück u Erläbnis hei gange.

Ganz härzläche Dank üsem Begleiter-Team, es isch schön gsi u het guet to. 

Vom Webmaster här ganz e schöne Dank für dä churzwylig und vielsytig Reisebricht. D Marlis Gfeller het bym Schrybe grad so viel Regischter zoge, wie der Organischt am Konzärt im Dom z Sankt Blasien. Und last but not least: Aui Fotone hei mir eim z verdanke, wo säuber gar niene druffe isch. Gar niene? Momou! Merci Chlous!