- Home
- |
- Aktuell
- |
- News
- |
- Archiv Trachselwald
Seniorenreise 2015
Vou Erwartig si am Morge vom 2. Juni e Chupele Seniorinne u Seniore
i Car vor Sommer AG Grünen ygschtige. Mit gmüetlechem Brichte hei
mir das Reisli i Agriff gno. Via Sumiswald, Huttwil, Wolhusen isch es
richtig Luzern. D Stadt het der Chauffeur gschickt umfahre und de
Küssnacht am Rigi agstüret. Vo dert a si du bym einte oder angere
Erinnerige a d Schueuzyt ufcho. Scho gly het me nämlech am Wägwyser
„Hohle Gasse“ chönne läse. Natürlech isch eim do der Wilhelm Tell i
Sinn cho. Der Bärgsturz vo Arth Goldau, d Schlacht am Morgarte si
wyteri Begäbeheitie, wo eim si i Erinnerig grüeft worde. We me o die
Jahrzahle nüm grad het im Chopf gha, het eim der Chauffeur Ruedi
Steiner das mit sym Wüsse chönne usbügle. Übere Sattel u übere
Ratenpass isch es gäg em Gottschalkenberg zue.
Das feine Mittagässe im Restaurant het aune guet gmundet. Es isch du no chly Zyt blibe für
di schöni Ussicht z gniesse. Do hät mes no lang möge erlyde.
Wyter geits dür s schöne Zugerland via Menzingen nach Zug. Es het
du no e chlyni Änderig gä. Wäge Platzmangu im Restaurant Schlacht
isch du d Fahrt über Cham, Sins Hochdorf, Hildisrieden diräkt uf
Sempach. Uf d Andacht vom Peter Schwab hei mer aber nid müesse
verzichte. Im Restaurant Seeland am schöne Sempachersee hei mer e
Ruum für üs gha, wo mer de Wort vom Pfarrer hei zueglost. Statt der
Orgele het du di autbewährti Blockflöte d Melodie vo de Lieder, wo mer
hei gsunge, vorgä.
Nach em Zvieri geits uf s letschte Bitzli vo üsem
Reisli. Über Nottwil, Grosswangen, Ettiswil si mer wieder gägem
Ämmitau zue cho. Der letscht Abstächer git’s du no vo Hüswil über
Ufhuse gäge Huttwil. Fei e chly müed aber mit viu schöne Erinnerige
a dä Tag simer wider im Heimisbach acho. De Froue Susann
Rothenbühler, Therese Hüsler, Silvia Schwarzentrub, Doris Rufener,
Barbara Züttel so wi am Pfarrer Peter Schwab, wo üs begleitet u we
nötig ghuufe hei, es ganz härzlechs Dankeschön.
Bericht: Vreni Wüthrich Bilder: Therese Hüsler und Peter Schwab