Es isch auso wieder einisch Zyt gsi für ne Konfirmationsgottesdienscht z Trachselwald. Bis es aube so wyt isch, bruucht es fei chly Vorbereitige. Im Konflager isch d Houptarbeit gleischtet worde aber ou süsch git's no dies un äis parat z mache. D Konfirmandinne und Konfirmande hei das Jahr der Gottesdienscht unger ds Thema "C'est la vie!" gstellt.

Es si Plakat gmale worde, de het ds Schlagzüg und die ganzi Musigalag i d Chiuche müesse züglet und ygrichtet wärde und schliesselch isch alles für dä gross Tag parat gsi. D Lüt si nadisna z Trachselwald ytroffe und gäg der Chiuche zue trappet. D Könfis hei no hurti im Skript letschti Vorbereitige troffe. Sogar der Gmeindspresidänt isch cho luege und ou es paar ehemaligi Konfirmandinne u Konfirmande hei der Wääg i d Chiuche gfunge.

De no der offizielle Fototermin mit em Hans Mosimann und de het's chönne losga. Zum Ygangsspiel vom Organischt si d Konfirmandinne und Konfirmande i d Chiuche yzoge und hei grad vo Afang a ds Szepter überno.

"Chunnt ächt das guet?" wird sich diese und äine am Afang gfragt ha. Es isch guet cho. Vor Begrüessig über ds Gebätt, verschiedene Bytreg, Liedvortreg und Moderationsteile hei die junge Froue und Manne souverän, ruhig und doch engagiert dür dä Gottesdienscht gfüert.

Ou Gmeindslieder us em Chiuchegsangbuech si gsunge worde. Das het natürlech wunderschön tönt by so viu Lüt. De en erschte Schreckmomänt: Bym Erklimme vor Kanzle stoglet sich der Pfarrer, touchet aber nam ene Wyli hinger der Kanzubrüschtig uuf. Er git sofort Entwarnig und doch frage sich bis nam Gottesdienscht d Lüt, ob's ihm ächt öppis gmacht oder ob er am Änd nume derglyche ta het. Aber es isch haut scho so: "Wer sein Leben bewahren will, achtet auf seinen Weg." Spr. 16,17

De schliesslech der fyrlech Höhepunkt, die eigetlechi Konfirmation. Der Pfarrer überreicht aune ds Konfbild mit em sälber gwählte Motiv und em Bibelwort als Konfspruch. De überchöme sie vor Presidäntin vom Chiuchgmeindrat no d Konfurkund und e grossi roti Rose überreicht.

Mou, so vom Schiff uus isch doch das ganz e gfröiti Sach gsi, die Konf. De übernähme no eis d Konfirmandinne und d Konfirmande ds Szepter und leite mit em Lied "Ein Hoch auf uns" zum Abschluss vo däm Gottesdienscht mit Fürbitte, Mitteilige, Verdankige und Säge über.

Natürlech ghört de zure Konf ou ds Familiefescht im Aschluss dra. Die Fotone hei mer übrigens vom Budi Aeschbacher us Louperswil zur Verfüegig gstellt bercho. Merci viu mau!