- Home
- |
- Aktuell
- |
- News
- |
- Archiv Trachselwald
"Seniorereis 2013"
Nach em Ysammle vo de Gescht im ganze Grabe ume het sich die munteri Reiseschar uf e Wäg Richtig Konolfinge – Chiese i ds Bärner Oberland gmacht. Ds Wätter het sich zum Glück afe eis e chly vor brevere Syte zeigt.
Dür ds Simmetal uf – bekanntlech git’s dert nume zwo Kurve, e Rächts- und e Linkskurve – het me i gmüetlecher Fahrt Zwöisimme erreicht und isch de via St. Stephan gäge Mittag ar Länk acho. Im Gaschthof Chrüz het scho ds Ässe gwartet, de zfridene Gsichter uf de Fotine a isch es ämu guet gsi.
Nach eme schöne usgibige Ufenthalt, wo d Theres Hüsler nach em lybleche no e Bytrag a ds geischtliche Wohl gleischtet het, isch d Fahrt wytergange. Über e Jounpass und dür ds Greyerzerland isch paar Kilometer vor Bärn im Gaschthof St. Jakob z Wünnewil no der Zvierihalt ygschalte worde. Die kompetänti Chauffeuse vo der Sommer AG und ds Team vom Froueverein mit der Therese Hüsler, der Susanne Rothenbühler, der Silvia Schwarzentrub und der Barbara Züttel hei für ne rybigslose Ablouf vo däm schöne Tag gsorget. Schöne Dank all dene Lüt!