Seniorenausflug 2010

Am letzten Altersnachmittag im April stimmten die Anwesenden über das Ziel des diesjährigen Seniorenausflugs ab. Sie entschieden sich für die Route Charmey - Jaunpass - Aeschi. Ein weiser Entscheid, wie sich herausstellte, zumal das organisierende Team des Frauenvereins Heimisbach Trachselwald ein weiteres mal vorbildliche Arbeit geleistet hatte. Aber lassen wir doch eine Teilnehmerin berichten!

Ja, das isch würklech e gschänkte Tag gsi, dä 8. Juni 2010 für e Seniorenusflug vo de Heimisbacher und de Trachselwalder. Nach em Ysammle vo de Lüt, wytume im Grabe fahre mer dür’s Ämmital gäge Bärn zue. Verby a äbene, grosse Gwächsbitze, wo mit blüjigem Mohn drinne wunderschön z luege si.

 

Hingäge z Bärn git’s grossi, ängi Boustelle, Hochhüser, Ample, wo gäng ume rot hei und mit Stou chöme mer langsam vorwärts. Üse Chauffeur meischteret das grandios

.

U gly einisch fahre mer uf der Outobahn gäge Fribourg zue. Die ehrwüridigi Altstadt mit em Münschter macht üs grosse Ydruck. Am liebschte wär me grad e chly ga lädele, aber das cha me natürlech nid, grad still ha, we’s eim gluschtet. U d Manne hätte sicher nid grad Fröid.
Auso fahre mer wyter, u gly einisch gseht me scho der Greyerzersee. Mit syne 13,5 Kilometer isch das der lengscht Stousee vor Schwyz und liferet Strom vor allem für d Stadt Bern. Da cha me nume hoffe, dass ds Wasser gäng längt, we’s immer meh Strom brucht. Mir fahre jetz dür ds Greyerzerland und stuune über die schöni, abwächsligsrychi Landschaft mit em Moléson im Hingergrund, wo’s wahrhaftig z oberischt no chly Schnee het.

Churz vor Charmey zweigt der Chauffeur i ds malerische Dörfli Crésuz ab, wo im Hotel-Restaurant „Le vieux chalet“ der Tisch deckt isch für üs.

Ja, ungereinisch het me Hunger gha und mir gniesse das feine Ässe. Es wird derzue brichtet u glachet. Öppedie ghört me: „Magsch du no chly Fleisch? I ma gwüss nümm!“ U nach em Dessert heisst es wieder ufbräche. Adieu Suisse Romandie, wältsch rede lö mer hinger üs, bärndütsch geit doch no besser. Aber wie seit me doch:Ob dütsch, ob wältsch, c’est tout égal, le même soleil schynt überall.
Ds Wätter isch geng no guet und mir stuune über die ghogerigi Wält mit de wyt verstreute Alphütte. Dür’s Jaunbachtal fahre mir Richtig Jaunpass. Obsi und Nidsi über Kurve u Chehre geit’s gäg em Bärner Oberland zue. Über Rychebach fahre mir dür ds Simmetal. Und ou hie gseht me die verstreute Alphütte u grosse Schüre. Das gseht soo schön us, aber dass d Arbeit müehsam und hert isch, a das däicht me weniger.
Über Erlebach fahre mir am Thunersee entgäge. Via Wimmis geit’s gäge Aeschi zue. Hie gö mer no i d Chiuche zur Andacht. Mir stuune nid weni, wo im Chiuchhof en Alphornbläserin üs mit schöne warme Tön Gottwilche heisst.

Es isch e schöni Chiuche und es tuet guet, chly zur Besinnig z cho. Mir singe no ds Lied Là-haut sur la montagne u dernah faht üse Pfarrer wahrhaftig uf wältsch a z predige. Aber er merkt no gly, dass es uf Bärndütsch besser geit. Er seit üs, dass mir im Läbe es Ziel bruche, e läbigi Hoffnig, wo us Gott chunnt U mir sölle d Hoffnig nid ufgä. Wenn die Hoffnung erwacht, stirbt die Verzweiflung, zitiert er es Sprichwort.
Das si gueti Wort, wo eim Muet mache. Mir hei no gsunge u nach em Gebätt spielt d Organischtin zwöi Jodellieder vom Adolf Stähli: „Am Thunersee“ und ds Tüpfli uf em i „Ds Ankebälli“.
Änet der Chiuche im Stärne hei mer no öppis trunke, u du isch d Heifahrt cho. Chly müed isch me doch du gsi, aber mir hei no der Niese gseh, wo het e Huet gha, u das bedütet - ds Wätter wird guet, u prompt het es vo Thun gäge Konolfinge zue afa rägne, aber mir si ja am Schärme gsi, und wieder daheim im Heimisbach het scho ume d Sunne gschune. Alli hei d Reis guet überstange und es geit an es Adie säge: Blyb gsung… Läb wohl… Bis nächscht Jahr…
Allne, wo zu dere schöne Reis bytrage hei es grosses Merci. Vorab üsem Chauffeur für die gueti Fahrt, de füf guete Seele vom Froueverein und vor Spitex für’s organisiere und betreue, üsem Pfarrer Peter Schwab für’s da sy und die guete Wort u nid z letscht der Chiuchgmeind für ds offerierte Zmittag. Allne es härzlechs danke, Gott befohlen, bis ds nächschte Jahr.
Text: He.Me.Ro. Bilder T.Hüsler + P. Schwab

zurück zur Liste

Pfarrer | Peter Schwab | Dorf 9 | 3456 Trachselwald | Telefon 034 431 11 52 | e-mail